෴ ශනි මාරුව ෴

කවදාවත් නැතිව පන්සලේ සෙනඟ පිරිලා , දින දර්ශනය දිහාට මගේ නෙත් යොමු වුනේ  හිතේ තිබුන සැකය හරි ද වැරදිද කියල බලා ගන්න. හරි , මේ මාසේ පොහොය ත් පහු වෙලා , මොකද මේ.

“ සෙනසුරු මාරුවට විශේෂ බෝධි පූජාවක් තියේලු. මටත් යන්න තියේ නම් හොඳයි. “

අම්මා කීවේ මුළුතැන් ගෙයි උඩම පඩියෙ වාඩි වෙලා දෑතින්ම දණිස් පිරිමදිමින්.

“ ඇයි අම්මා ? ලග්නෙට හොඳ මදිද “

ඈ කීව දිගු විස්තරය අනුව , ඇයට ලබන කාලය අන්තිම නරකයි. ඒත් මට හොඳයි. ලග්න දොළහෙන් ශනි මාරුව සුබම මගේ ලග්නයට ලු. ඒත් හදවත ළඟින්ම ඉන්න ලෙංගතු කෙනෙක්ට නරකක් වෙද්දි , මට කොහොමෙයි හොඳ වෙන්නේ.

අනික තමන්ට වඩා තමන්ගෙ හිත අද්දරම ඉන්න අයට නරකක් අයහපතක් වෙනව නම් , තමන්ට දෙයක් උනාට වඩා දරා ගන්න කොයි තරම් නම් අමාරු ද කියල මම දන්නවා.

පෝයටවත් පන්සල් නොයන මම ඉස්සර දහම් පාසල් අරන් ගියපු මල් වට්ටියත් අරන් වත්ත පහලට පිය මැන්නේ කොහෙන් දෝ ආපු බලවත් බලවේගයක් මාව මෙහෙයවන ව වගේ.

පලි:- 
පන්සලේ සෙනඟ පිරේවි.....

ගහ කොළ වල ලස්සනට පිපිලා ගෙවල් ඉස්සරහ පෝච්චි වල පඳුරු වල හිනා වුන මල්  වලට , බුදු හාමුදුරුවන්ගේ මල් ආසනයේ  ඉඩ මදි වේවි.
පහන් වැටේ පහන් තියන්න ඉඩ නැතිව සල්ලි දීල කඩෙන් ගත්ත පොල් තෙල්  උතුරල යාවි.
බෝ මළුවේ  සුදු වැලි , ගොරෝසු කකුළ් වලටම පෑඟලා තවත් හීනි කැටි වලට බිඳල යාවි.

එකිනෙකාගෙ මුහුණූ අඳුර ගන්න බැරි තරමට පංසලේ තියෙන පුංචි දේවාලය , හඳුන් කූරු දුමෙන් පිරල යාවි.
පැන් කළයක් වෙන් කර ගන්න අම්මල පොඩි වුන්ව වේලාසන පන්සලට එළවාවි.
දහසක් බලාපොරොත්තු මැද්දේ සුසුම් වලට අහු වෙලා සැලෙන  බෝ ගහේ සිහින් බෝ කොළ මේ දේවල් සේරම දරා ගන්නේ කොහොමද ?

පපලි:- හැමදාමත් ගහ පුරා සුදට සුදේ මල් රෙද්දක් වහ ගෙන හිටපු වතු සුද්ද ගහ , මං යන කොට පොහොට්ටුවක් නැතිව තනි වෙලා බලාන ඉන්නව දැකපු මම , ශනිත් එක්ක හිමීට හිනා වුනා...........